是日星期一，勢估唔到，暑假一開波颱風泰利就送咗一個美好嘅假日俾我哋。
打風都市傳說之首「李氏力場」再一次證明已經撤資或者移居咗另一國度。
打風放假冇咩做？睇戲、打牌、唱K？Out咗喇～
今時今日多咗個選項就係萬惡嘅Work From Home。
打風放假對我嚟講，係終於有時間可以做一啲平時唔想花時間做嘅事，或者諗一啲平時唔能夠靜靜哋諗嘅正經事。
所以今日做過啲咩？搵下有咩戲想去睇，清理維修屋企壞咗嘅嘢，食一啲買咗好耐嘅零食，望下窗外風雨飄搖。
最重要嘅事，其實係處理幾日後東京遊嘅一切濕碎嘢。近年記性差啲，對自己plan好嘅行程要一睇再睇，由頭check一次機票酒店交通租車天氣景點，怕自己有嘢改咗而記錯。
重中之重嘅事，係要從頭溫習一次揸車技巧。我一年都未必去到一次旅行又要揸車自駕遊，老實講真係會壓力爆煲。雖然普遍印象喺日本自駕遊都安全，但作為十年間只有十幾日揸車經驗嘅生手司機，精神會緊張都係基本盤。點從頭溫習？當然係靠YouTube，搵返一啲教車片睇下，攞返一啲感覺。
嗱！我係杞人憂天居安思危型，唔buy水到橋頭自然直。
點解唔去補下鐘？那有時間～直接喺東京街頭補一劑吧。
重要嘅事講7次：…
人無事先做到世界冠軍！…
人無事先做到世界冠軍！……
人無事先做到世界冠軍！………
人無事先做到世界冠軍！…………
人無事先做到世界冠軍！……………
人無事先做到世界冠軍！………………
人無事先做到世界冠軍！…………………
