二零二三年八月三十一日，係好特別嘅一日。
「蘇拉」，唔係意大利球星，而係一個風暴名。蓄勢待發來勢凶凶，同六十一年前嘅十號風球溫黛拉埋嚟比較。勁過溫黛？吹大咗？依家未知，但最好唔好勁過，香港唔需要被摧毁一次。
但呢一日，迎來我第一次感官上的風暴，同埋叫白車嘅體驗。
叫白車——通常係等於打九九九嘅。暫時人生中打九九九只有兩次，第一次係因為阿媽半夜喺屋企跌親，而第二次，就係我「唔舒服」。用「唔舒服」嚟形容係唔能夠合適表達到我當時嘅心情，正確啲講當時我覺得全身好唔妥，去到一個覺得會失去知覺嘅地步。
到底發生咩事？過程大約係咁：
- 喺辦公室做嘢覺得凍，所以著件外套
- 越坐越凍，望下手錶，心跳去到每秒一百下，想搵個暖啲嘅地方抖吓
- 起身行路時，個人浮浮哋，慢慢有啲心震手震
- 因為浮所以行得好慢，幾分鐘後都無任何改善，隻手震到打訊息都有困難
- 感覺好唔妥，決定「要離開去睇醫生」
- 執野走，到咗戶外係暖咗啲，但行幾步後個人越嚟越浮（注意唔係暈，頭腦好清醒）
- 返轉頭去建築物入口坐一坐，連坐直個人都冇力，感覺話我知「要求救！」，打九九九，而物管職員亦已同時報警叫白車
唔肯定等咗幾耐，見到救護員。
。。。
寫得出咁多字，因為離開咗醫院，訓咗幾個鐘，精神好返好多。
到底發生咩事？雖然呢一刻已經係八號風球，但想訓多覺再講。
重要嘅事講7次：
了解自己身體狀態好緊要…
了解自己身體狀態好緊要……
了解自己身體狀態好緊要………
了解自己身體狀態好緊要…………
了解自己身體狀態好緊要……………
了解自己身體狀態好緊要………………
了解自己身體狀態好緊要…………………
