眨下眼，2024年都就快過2個月，仲未諗今年想做乜？留返拜山先講丫笨！
係，「我真係好X廢！」
我唔想好hea咁講一堆想做咩做咩，要整理一個list其實唔難，但真係打算用嚟緊10個月去完成今年目標，就真係要諗做唔做得到。我太了解自己，「放棄」從來都係自己第一個選項咁滯。
幾廿歲人，我唔想再咁輕易放過自己！我想改變！
Coz’ YOLO!
- 德 [練好字]
舊年我已經發現咗一個事實，就係：～我。唔。識。寫。中。文。字～
我畢業後返第一份工開始，我係學「簡易」輸入法寫中文字，上聊天室玩ICQ開始直到今日要Whatsapp或者google search，一切互聯網中文字都係靠「簡易」輸入法。
相信學「倉頡」輸入法嘅網民都未必會去到唔識寫中文字，「倉頡」始終係將一個字拆成碼，對字嘅筆劃會有印象啲，但「簡易」輸入法只係需要頭尾碼再揀就輸入到，久而久之，隻字中間嘅筆劃越來越模糊。
我覺得呢個係一個危機，要補救一下。 - 智 [睇好書]
由細到大我都唔係一個讀書人，因為我好容易心散，對眼唔停四圍望。
男性真係一隻視覺動物嚟㗎！
依家年紀大咗，對眼唔好、散光深、輕微白內瘴，睇一本字體比較細嘅書都好快攰。但我呢係一隻對新事物好奇嘅動物嚟！上網睇Youtube Netflix, 聽Podcast已經係一個must。不過為咗視網膜，實體書係其中一樣比較謢眼嘅活動。
疫情關係，我開始會喺圖書館搵一啲有興趣嘅書睇，例如沖咖啡、焗麵包、中醫、跑步、理財等等。除咗我經常續借又遲還書要罰錢外，都算係免費娛樂。 - 體 [跑好步]
我跑步嘅起點係因為體檢報告俾血脂膽固醇嚇咗一嚇。
2024年頭一套電視節目「公司冇迫我跑馬拉松」帶動好多人開始跑步，令我對跑步呢團火更大。依家每個星期跑3次，有時會慢跑7km，有時會跟garmin coach做training。
近幾年跑得最遠都只係14km左右，大多數都係果日比較生猛而想即興跑一段長課。今年特別想試跑一次半馬距離，睇睇自己嘅能耐去到邊度。但我又唔特別想去參加長跑比賽，原因都係唔想早起身，為咗件大會跑衫或者打個卡而要搞一大輪。 - 群 [寫好扑]
呢個What7isay.today算係我一個宅blog，想喺自己記性慢慢變差之前，好純粹咁記低一啲記憶同想法。但係每一日都實在有太多唔同嘅事發生，如果開個Facebook或者Twitter(X) post寫幾十字，又唔係我想做嘅嘢。
我嘅理想宅blog當然係希望透過廣東話文字記錄，幫有緣睇到嘅你解解悶（好明顯係要識廣東話！），期望你產生點點共鳴，成為一個你熟悉嘅陌生人。 - 美 [賞好景]
2023年有幸去咗兩次台灣一次日本，三次旅程唔少地方都係第一次到：野柳女王頭、陽明山、宜蘭、富士山、東京迪士尼、日本醫院…
今年我冇咩旅行想法，但希望有機會喺外地靚景之下行個山或者跑個步，我相信係一個好唔同嘅體驗。
另外，我都有想過去一個未曾去過嘅國家旅行，好似泰國。一來我自己一家人都未去過，二來我應該唔會自駕遊，免卻自己要安排成個自駕行程，輕鬆好多。 - 靈 [讀好經]
由細睇聖經睇到大，都係和合本、和修本、新譯本等等。舊年特登買咗一本廣東話聖經，想睇一睇廣東話譯本係咩一回事。年頭已經開始由馬太福音開始讀經，希望今年可以完成讀完一次新約聖經。
重要嘅事講7次：
2024年我要做個找數真漢子，我話嘅…
2024年我要做個找數真漢子，我話嘅……
2024年我要做個找數真漢子，我話嘅………
2024年我要做個找數真漢子，我話嘅…………
2024年我要做個找數真漢子，我話嘅……………
2024年我要做個找數真漢子，我話嘅………………
2024年我要做個找數真漢子，我話嘅…………………
