去日本旅行，是但玩一個地方，都有無數可走嘅點。
如果係東京呢？
「東京」喎，大到無倫！你要一步一腳印，斷埋士啤腳都行唔晒。
想去搵旅遊嘅樂趣，可以為每次嘅旅行開個主題，窮遊、豪食、揼骨、玩水、自駕、極限，各式其式。
體驗當地醫療系統會唔會係深度遊嘅一種？係，係迫不得已嘅體驗。去旅行十居其十都唔會預時間去睇醫生，而且人生路不熟（我明白絕大部分香港人對日本好熟，但係睇醫生喎，唔係睇衫睇鞋睇表演！），言語不通（Google Translate真係一個極偉大嘅發明！），除非健康狀況差到不能避免。
2023年夏季來到久違嘅東京，富士山、迪士尼園區呢兩大景點係必到之地。喺整個旅程近尾聲時，一家人入住距離迪士尼園區只有一站距離嘅新浦安站東方灣酒店，位置方便到無倫。酒店亦有提供穿梭巴士來往酒店同埋園區入口。
7月嘅東京，熱度非同小可，想玩足一日自然要好好準備。可惜萬事俱備只欠運氣，小女呢次遊日濕疹發得特別嚴重，再加上玩咗半日之後，小女表現得異常乏力。老婆用手探探她額頭，唉，小女發燒了！
未到太陽落山，我地就返酒店休息。
當時候日本猴痘非常流行，幸運地因濕疹關係，老婆已經準備好基本藥物應付呢種情況。小女食過退燒藥，就一直訓訓訓。到下一日朝早，小女算回復小小精神，但我地發現佢身上有濕疹嘅地方出現很多一點點，似乎發炎起膿了。
呢啲一點點，唔會係猴痘卦？！
嚟到呢個moment，睇醫生is a must。
我即刻上網搵診所資料，亦拜託酒店員工幫手，最後知道原來酒店附近就有一間順天堂醫院，咁我地一家立刻起行。
跟Google Map指示行到去一間診所，推門入去見到櫃位有個姨姨。問題嚟喇：講英文完全行唔通！我同姨姨雞同鴨講咗冇幾耐，有兩個姑娘經過，而其中一個嚟自內地識得講國語！有救了。
原來我地以為係診所嘅地方，係順天堂醫院大學部，對面先係順天堂醫院。姑娘知道小女需要睇醫生，佢同同事講咗幾句就將手上嘅嘢交俾佢，就親身帶我地去對面醫院登記，再同醫院姑娘交代我地嘅情況。等咗無幾耐，我地就被帶去兒科診症隔離房等待見醫生。隔離房只有2張椅，空間只夠容納3個人，有兩道門，我地由其中一道門進入。
嚟到呢度，我非常感恩姑娘嘅幫忙亦有啲驚訝，由姑娘帶我地出發去醫院直到去隔離房等待見醫生，大大話話都有成個鐘。無呢個幫忙，我相信唔會半日就睇到醫生。
突然隔離房另一道門打開，診症室出現眼前，無幾耐醫生就入嚟。
擁有一雙明亮大眼睛、清秀面型配上淡妝的女兒科醫生，戴住口罩都感覺到係一個標緻可人兒。喺日本用英語簡單溝通係可以，但同醫生溝通唯有靠手機，我將早前用英文寫低小女嘅簡單病歷同埋呢兩日嘅狀態俾醫生睇，而醫生就用google translate寫低佢想知嘅事。經過一輪google對話之後，我估醫生覺得有需要了解清楚皮膚發炎問題，所以再call另一位皮膚科醫生嚟，細心檢查小女身體唔同部位嘅皮膚。最後，女兒科醫生強烈建議驗血以了解發炎因素，但小女一聽到要抽血就登時眼紅紅準備爆喊，而我亦提出我們下一日就會返回香港，會立刻睇醫生，所以醫生唯有開藥單，亦千叮萬囑回港後一定要睇醫生。
由出發去醫院到睇完症差不多用接近3個鐘，整個斷診過程花咗唔少時間，俾我感覺係醫生非常認真對待兒童病人， 呢3個鐘嘅CP值好高。最後診症費用只係萬幾Yen，唔駛一千蚊港幣，至於藥就要拎住藥單去附近嘅藥局配藥。
唔係間間藥局都有晒你要配嘅藥，我去嘅第一間藥局就係唔齊藥，但藥局姑娘好好咁幫我打電話問另一間比較大嘅藥局，仲幫我Fax咗張藥單過去大藥局再指示我點樣去，真係非常貼心。
旅行撞著有病要睇醫生其實真係幾灰，但係整個過程除咗感恩一切順利之外，亦感受到日本文化中待人細膩以誠嘅態度。眼見整間醫院運作並唔似打仗狀態，雖則係有人多嘅時候，但我感受唔到果種趕急到死嘅壓迫感，至少我地一家人去睇3個鐘病都無果種成個人散晒嘅辛苦。
重要嘅事講7次：
多謝所有喺呢件事上出手相助嘅：酒店員工…
多謝所有喺呢件事上出手相助嘅：帶路姑娘……
多謝所有喺呢件事上出手相助嘅：女兒科醫生………
多謝所有喺呢件事上出手相助嘅：皮膚專科醫生…………
多謝所有喺呢件事上出手相助嘅：藥局姑娘……………
多謝所有喺呢件事上出手相助嘅：Google Translate………………
多謝所有喺呢件事上出手相助嘅：照顧好小女嘅老婆🙇🏻♂…………………
