上回講到新laptop冇畫面，即係一個好明顯嘅defect，所以我就上返Amazon App入面去搵Customer Service準備退貨。依家絕大多數大型網站或甚至app都會用chatbot提供一般查詢俾顧客，如果顧客需要簡單直接嘅資訊，只需要提供keyword，Chatbot已經可以好快識別你需再要咩資料而提供選擇一，所以係非常幫到手。
但，只限一般簡單資訊查詢。
雖然喺美國網購嚟講，退貨算係平常事，但我唔係身處美國，亦冇試過正式退貨（因為我真係唔係購物常客，買貴嘢經驗非常有限），美馬（即係網絡上對Amazon US嘅稱呼）退貨係有一大版水蛇春咁長嘅文字詳細說明退貨要點點點。對於我呢個退貨新手，自然唔想睇晒咁多文字，最直接方法就係搵個CS講一次要點做，咁就免花時間卻睇文字又可以確保做法正確。
一開始對話，美馬CS會首先確認我因咩事要退貨（原因自然就係部Laptop開機冇畫面，所以會將佢歸類為defect item），當提供咗退貨原因後，CS叫我留意一個關於退貨嘅email並跟住email入面提供嘅label，利用速遞將貨件退回。
退件運費係我開始要揀carrier時嘅一個考慮點，雖然美馬有講退貨原因係defect item的話運費係會全數退回，但我依然嘗試格價。點知一問其他carrier（Speedpost, SF express），佢地講明有鋰電嘅貨件唔可以運，所以基本上就變成只可以幫襯返DHL。喺DHL網站簡單打個價，先至知原來運一部3.4kg laptop去美國LasVegas係要過千蚊！！！所以假如唔係因為item defected要退貨嘅話，美馬應該唔會退還全數運費。
折騰一輪終於將部laptop送返去Amazon US，亦都好快我就見到信用卡收到買laptop嘅退款同埋USD20嘅退款。
咪住！USD20？咩事先？師傅，運費係HKD 1,074喎？於是，我又上美馬CS問個究竟。CS解釋，你要將有運單號碼同埋貨件賬單號碼嘅文件影張相再email俾我，我哋覆核之後就會喺幾個工作日後退還運費。咁好啦，為咗更清楚準確，於是我直接將DHL email俾我嘅運單同埋賬單PDF一併forward俾美馬CS，之後等收錢。
過咗成個禮拜，美馬乜動靜都冇，於是我再搵美馬CS傾下計。CS同我講，佢地收到我嘅email attachment，但其實佢地係需要一張有運單號碼同埋貨件賬單號碼嘅相，先可以繼續處理退款。
我即時問：Screen capture得唔得？（呢個真係一個極on9嘅問題！）
CS：唔得。要photo of physical receipt。
我：DHL只係send digital copy俾我，咁我將PDF印出嚟再影相send俾你得唔得？
CS：唔得。要有Carrier嘅文件證明呢個PDF先得。
我：依家係廿二世界插人兩鑊嘅世代，仲有hardcopy咩？我喺美馬買嘢唔通要飛鴿傳書呀，全部paperless啦你搵張紙俾我睇（嗱！唔好意思，美馬送件盒入面係真係有實體單嘅，但。。。唔會有人理㗎）
CS：真係Sor9ly，冇photo of physical receipt我哋唔能夠繼續退款過程。
我心諗～哇你老味？？？即係玩9我啦！！！[@)!&*^%($>&*\#@&?+<]
我：我。要。投。訴。快啲俾個投訴渠道我，或者Jeff個email address都得………
當然到最後，都係無奈地Quit Chat。
於是乎，我又真係膽粗粗咁打去DHL CS度問個究竟，得到嘅答案係地球人都估到：PDF invoice就係official document，想要physical receipt就print出嚟。喺呢一刻，我突然感受到呢個世界真係可以有強權冇公理～～～仲要發生喺一間美國巨企身上，「果9百幾蚊運費似乎凍過水」呢個念頭好自然就浮出嚟。搞咗接近成個月，已經蝕咗個Prime Day Sale，依家Laptop又冇，仲要俾多9百幾蚊？個世界仲唔夠荒謬？早知我就劈開部Laptop先寄返去。
但。又真係冇理由唔試下print個PDF出嚟再影張相send返去搏多劑。於是隔日，PDF Print出嚟、影張相、send email、再即刻搵美馬CS睇下點。
今次，呢位叫Mary嘅美馬CS，好認真咁搵埋上司一齊睇晒我個case同埋email之後，好快就進行退款手績。佢話佢都唔太明白點解上次我已經email個PDF invoice都唔能夠退款，所以話會反映呢件事俾management知道等等。
就係咁，唔夠24小時，我已經收返筆運費。
重要嘅事講7次：
天無絕人之網路…
天無絕人之網路……
天無絕人之網路………
天無絕人之網路…………
天無絕人之網路……………
天無絕人之網路………………
天無絕人之網路…………………
