難得地喺疫情幾年後嘅2023，世界之間再無乜阻隔，終於可以暑假期間出走一遊。
日元低水，香港人旅遊熱點自然就係日本唔需要揀，要揀嘅自然就係去日本邊度。
咁多年來，遊日都只係好幾次，都係日本主要比較繁華嘅都市如東京大阪福岡札幌那霸，再加一啲近郊景點。今次揀嘅地點就係同老婆婚後第一次遊日的城市——東京。
決定地點之後第一件事就係搵機票。日本開關再加上放寬檢疫後一段時間，飛日本嘅機票價格直頭係火箭升空一樣，以往2,3,4千蚊一張來回東京機票，一下子變成5,6,7千，暑假期間再貴多啲啲就係指定動作。最後，一張廉航來回成田機場機票承惠5千幾蚊都咪話唔肉赤。
搞掂機票之後，第二件事自然就係去邊度玩。當年遊東京只係玩咗8日，就咁搵本閃閃旅遊書，跟住沿山手線玩一圈，再加插箱根一日遊，回憶滿滿。當年只係JR East走天下，今次有國際車牌在手，可揀嘅地方更多彈性更大，於是打開Google Map睇一睇東京四圍，一個世界遺產地標随即映入眼簾。
我嘅旅行歴史其實冇乜去過高地見過高山，記憶中只係台灣朋友載去台中山上茶田試茶。富士山真身係咩一回事，一座3776米高嘅山喺我面前會有幾震撼，我真係想像唔到。疫情封山幾年，今年夏天富士山終於開山，自然吸引世人去登頂睇御來光，又吸引咗我嘅眼球。但吸引還吸引，今次帶住一家大細遊日，雖然自駕但為免麻煩，登頂唔會係我嘅選項，諗住慳水慳力去河口湖山口湖影張靚相打個靚卡就於願足爾。
出發當日，我要先由酒店行路去水道橋站去東京站的Toyota Rent a car攞車再揸車去酒店接送人同行李。由於攞車要大約一小時，其間我亦因為對部Prius 2022非常陌生而搞到好遲先出到停車場準備返酒店，再加上我駕駛經驗只來自海外自駕，對上一次已經係3年前台中之旅，喺非常生手而膽未生毛情況下，要用整整兩小時先安全返到酒店樓下。
由東京自駕去河口湖大約要百幾公里，早上11點由水道橋出發，上到首都高就開始塞車，基本上成程車都有4，5次慢車甚至停車。整個車程最後用咗超過3個鐘，家人已經斷斷續續瞓吓醒吓都叫休息咗陣，作為司機自然要硬食呢個操車機會。雖然車程長，但途中不乏驚喜，喺能見度非常好嘅情況下隱約見到富士山嘅身影，頓時我心感興奮。
要近距離欣賞富士山，我選擇咗第二日近中午時份自駕上去五合目。沿路一直心情興奮穿梳林木之間，但好快就俾一個交通管制大叔截停，俾咗一張紙我，要跟住指示去北麓停車場。原來上富士山有交通管制之下，私家車要停車轉搭巴士或者的士上山。雖然當下唔多情願，但喺家人支持下決定上山。
用咗一個小時坐巴士上車，話咁快一大座世界遺產就喺我面前，的的確確震撼。
重要嘅事講7次：
上山頂睇吓無壞丫…
上山頂睇吓無壞丫……
上山頂睇吓無壞丫………
上山頂睇吓無壞丫…………
上山頂睇吓無壞丫……………
上山頂睇吓無壞丫………………
上山頂睇吓無壞丫…………………
