台灣，係我當年畢業後一出嚟工作收到份糧開始去嘅第一次旅行地方。我講嘅當年係講緊回歸後嘅上世紀未，算係上一世嘅事。
點解要去台灣？
就係：見網友～！～！你冇睇錯，係見網友。
上世紀嘅尖啄潮流科技，除咗互聯網就係手提電話。一部世紀型格電話Motarola StarTac，係當時候個個趨之若鶩嘅劃時代產物，淨係個英文名稱已經係經典。
果時互聯網都只係出世無幾耐，亦未有Whatsapp, Facebook，比較流行嘅網上社交係發生喺個人電腦上用嘅ICQ MSN呢類通訊軟件，呢類通訊軟件需要喺電腦安裝程式再註冊一個戶口，就會得到一組數字去代表你同埋去連繫新朋友。
與此同時，瀏覽器如Netscape, Internet Explorer等成為上網工具，大堆網上聊天室或遊戲室等應運而生。你就靠自己改嘅一個網名登入聊天室，同人Say個Hello打開話匣子。由於聊天室只有文字輸入，你嘅網名同埋你嘅文字回應就成為聊天室內嘅身份。
我當年畢業後第一份工開始直到依家都係關於互聯網產業，自然有唔少時間利用通訊軟件同瀏覽器喺網際間游走，認識好多來自五湖四海嘅網友，而其中有一個叫「爽爽茶座」嘅地方。
當年網絡資訊簡單人心亦然，上網嘅人亦係比較Pure比較True，所以在聊天室傾傾下都會問大家身處何方，日日24小時都傾計自然好快就混熟。慢慢地，住香港嘅網友就會搞聚會約出嚟食飯吹水，由網友變成實體朋友。果陣聊天室入面有唔少台灣網友，大家亦傾得非常投契，於是乎會去到搞跨地域網聚，香港網友會組團到台灣，而台灣網友亦會來香港一聚。亦因為咁，唔少網友情緣逐漸催生…
嗯。。。
當年飛台灣無論係機票或者駛費都好平，一年去幾次台灣亦可負擔，甚至有時嚟個短Trip星期六飛台北聚一聚食餐飯再星期日返港。而台灣網友遍佈南北中部，為咗一盡地主之誼，會為到來的香港網友安排不同地點飯局和行程，大家一起盡興情誼亦漸深厚。
台灣美，人心善，那些年，叫人百般滋味在心頭。
Those were the days.
重要嘅事講7次：
時光停喺果一刻，多好…
時光停喺果一刻，多好……
時光停喺果一刻，多好………
時光停喺果一刻，多好…………
時光停喺果一刻，多好……………
時光停喺果一刻，多好………………
時光停喺果一刻，多好…………………
